Grunnsteinnedlegging for Gullfaks A

Statoil-direktør Arve Johnsen fekk tidleg i februar 1983 æra av å legge ned grunnsteinen for Gullfaks A. Grunnsteinsnedlegginga var ein symbolsk start for bygginga av den fyrste plattforma på Gullfaksfeltet.

Den fyrste etappen i den maratonen som ei plattformbygging må seiast å vere, var bygginga av lagercellene til plattforma. Neste etappe var bygginga av skafta som ståldekket skulle kvile på. Parallelt med bygginga av understellet, blei nemnte ståldekk og alle modulane bygd, før dei to delane møtte kvarandre og var klare til å reise ut på feltet.

Gullfaks A sin grunnstein var fyrste brikka i ein byggeperiode som skulle strekke seg over i underkant av sju år, og avsluttast med produksjonsstart på Gullfaks C i desember 1989.